Að mæta með smjördollu í kastljósviðtal.

Borgi ekki skuldir óreiðumanna? Hvurn ands.... á maðurinn við? Dettur honum virkilega í hug að þjóðin þurfi ekki að borga skuldir okkar hvert okkar sem stofnaði til þeirra. Bakland bankamannana var Seðlabankinn og íslenska ríkið. Halda menn virkilega að Bjarni Ármanns og co hafi fengið stóru lánin út á andlitið? Davíð er leifturskýr og fyrir löngu búinn að átta sig á trúgirni þjóðar sinnar og hagaði sér í samræmi við það. Viðtalið og skrautlegar yfirlýsingar hans verða sennilega til að sturta því litla lánstrausti sem eftir er af lánstraunsti þjóðarinnar í niðurfallið.
Davíð var sjálfum sér líkur þarna. Mætti með smjördollurnar og klíndi í allar áttir. Hann er hreinn snillingur í að drepa málum á dreif svara ekki því sem hann er spurður um en gera stórmál úr aukaatriðinum. Það er ekki annað hægt en dást að kallinum, þessum mesta sjónhverfingamanni íslenskra stjórnmála, sennilega frá upphafi vega.
Ég saknaði spurninga hvers vegna bindiskylda bankanna var afnumin, spurninga um vaxtastefnu sem ekki virkaði, spurninga um hvers vegna fólk hraktist út í lántökur í erlendum gjaldmiðlum, spurninga um hrun krónunnar svo eitthvað sé nefnt.
Ég er alveg viss um að fjöldi fólks er núna með stjörnur í augum yfir snilli gamla landsföðurins. Ég skil það vel, fólk er almennt hrifnæmt og kallinn fór á kostum. En varla hafa erlendir lánardrottnar orðið hrifnir.
Svo mikið er víst!

Ríkið borgi ekki skuldir óreiðumanna

Er DO búinn að setja jeppann í bakkgír?

Það kemur æ betur í ljós þvílík fljótfærnisafglöp DO gerði með þjóðnýtingu Glitnis.  Og nú á að leysa málið með því að láta Kaupþing og Landsbankann skipta reitum hans á milli sín.  Hvernig má það í ósköpunum vera að einn maður niðri Seðlabanka viti betur en allir aðrir og gangi berlega á skjön við álit flestra þeirra hagspekinga sem hafa tjáð sig um efnahagsstjórn Seðlabankans?  Svo á almenningur að súpa seyðið þessari dellusúpu.  Á meðan sjálftökuliðið veður gullið upp að hnjám borgar almenningur brúsann í formi verðtryggingar og okurvaxta.

Hefur Geir ekki bein í nefinu  til að reka kallinn?

Eigendur Glitnis ekki með í ráðum

Krókódílatár?

Með hliðsjón af því sem á undan hefur gengið í samskiptum Baugsmanna og núverandi seðlabankastjóra og þeirri augljósu heiftar hans í garð Baugsmanna hefur óneitanlega hríslast um mann sú tilfinning að hann hafi grátið krókódílatárum yfir örlögum Glitnis og Stoða.
Loks hafi takmarkinu verið náð, koma Jóni Ásgeir og hinum "götustrákunum" á hnén. Eitthvað sem ekki tókst fyrir dómstólum.
Hver verður svo næstur: Landsbankinn? Hann getur varla verið í gæfulegri stöðu núna, hafandi lagt umtalsverðar fjárhæðir til sem nú tapast í þjóðnýtingu og gjaldþroti.
Það verður erfið nótt sem fer í hönd hjá sumum.. því miður.

Átelja harðlega vinnubrögð Seðlabanka

Bara byrjunin

Búast má við að sú orðræða sem nú hefur farið af stað með "játningum" Jóhanns R. Benediktssonar sé rétt að byrja. Þátt fyrir viðleitni Björns Bjarnasonar að bæta umhverfi löggæslunnar í landinu sé gáðra gjalda verð fer ekki fram hjá nokkrum manni það ófremdarástand í löggæslumálum.
Hver yfirmaðurinn eftir annan kvartar og kveinar undan fjármuna- og mannaflaskorti. Hinn almenni lögreglumaður kvartar líka og sýnir það í verki með því að flýja stéttina. Eftir sitja eldri lögreglumenn svo og þeir yngstu, sumir óskólagengnir.
Samhliða þessu hefur virðing almennings fyrir lögreglu hrapað og vandséð hvernig hún verður sótt aftur. Varla verður það með kjánalegum tilburðum ríkislögreglustjórans sem vill steypa öllum lögregluliðum landsins í eitt undir sína stjórn. Það er reyndar óskiljanlegt að á meðan einhver alsprækasti lögeglustjóri landsins er "hrakinn" úr starfi á grundvelli "5 ára reglunnar" skuli ríkislögreglustjóri sitja óhreyfður í embætti síðustu 11 ár. Gildir 5 ára reglan ekki um þann umdeilda mann hvers embætti hefur breyst mera á þessum tíma en flest önnur?
Það er sorglegt að sjá hvernig málum er komið og BB virðist vera að missa öll tök á viðfangsefninu. Hvenær skyldi röðin koma að Stefáni Eiríkssyni, alla vega virðist hann ekki vera að rekast vel í hjörðinni. Allir virðast vera skíthræddir við ríkislögreglustjórann nema ef vera skyldu menn eins og Jói Ben og gamli lyftingajaxlinn, Óskar Sigurpálsson, formaður Lögeglufélags Reykjavíkur sem sagði bara það sem almennir lögreglumenn hugsa og tala um sín á milli.
Það fara menn sem geta og þora.

Stóryrði og hrakspár Jóhanns „óvenjulegar“

Er ekki alveg að skilja þetta með sjarmann

Hvaða söknuður fylgir því þótt einhver mesta okubúlla íslenskra þjóðvega hverfi og glæsihöll hinna íslensku olíusheika rísi við nýju brúna. Þarna er ég búinn að eiga óteljandi viðkomum á síðustu 40 árum og hef aldrei fundið þennan "sjarma" þarna. Hins vegar liðið stundum við brottför eins og ég hafi verið rændur.
Gleymi því seint þegar ég lét gabbast af hamborgaratilboði dagsins, sem samanstóð af einum sveittum, með linu brauði, eggi, frönskum, salati og sósu. Bjálfaðist ekki til að skoða verðið se reyndist vera 1.050 krónur. Á sama tíma kostaði sami hammari 370 krónur í Hyrnunni sem hefur reyndar ekki orð á sér fyrir hagkvæm matarkaup.
Öllu skárra fannst mér að koma í Brúarskálann, þar sem persónulegt, þægilegt viðmót og nema síðustu árin eftir að eigendur Staðarskála keyptu. Eftir það fór glansinn af og allt drabbaðist niður. Vonandi bera N1 menn gæfu til að reka þetta með þeirri þjónustulund sem áður einkenndi starfsfólk Brúarskálans.
Að síðustu legg ég til að nýji skálinn verði í framtíðinni kallaður Brúarskáli. Einfalt mál hann stendur við brúarsporðinn.

Gamli Staðarskálaandinn fylgir

Inn í nútímann - eða hvað?

Gott mál hjá Sturlu Böðvarssyni forseta Alþingis sem staðið hefur fyrir margvíslegum breytingum á þingstörfum síðan hann varð forseti.  Að sjálfsögðu eiga fundir fastanefnda Alþingis að fara fram fyrir opnum dyrum, hvað annað.  Þess vegna líst mér afleitlega á þá skipan að nefndirnar hafi einhvert val um hvort fundirnir séu opnir eður ei.

Slíkt á einungis að gera algjörum undantekningum, og þá einungis séu viðkvæm mál einstaklinga eða fyrirtækja sem komi þar á fundarborðið.

En... þetta er þó framför.

Hægt að fylgjast með fundum fastanefnda

Meinsemdin blasir við en allir líta undan

Flestum hugsandi fólki má vera ljóst að núverandi fiskveiðistjórnunarkerfi hefur gengið sér til húðar.  Reyndar hefur mér virst það augaljóst frá upphafi að kerfi einokunar og sérréttinda er dæmt til þeirrar sjálfseyðingar sem nú er að ganga eftir.  Kerfinu var í fyrstu komið á fót, efalaust af góðum huga, til að bjarga veiðistofni þorsksins frá eyðileggingu og ofveiði.

Aðferðin við skiptingu auðlindarinnar var hins vegar ein galin og verða má.  Einungis ein stétt manna var tekin út og afhent auðlindin til notkunar, útgerðarmenn sem höfðu haldið skipum til veiða í þrjú svokölluð viðmiðunarár á undan kvótasetningunni 1984.  Eftir sátu með sárt ennið, sjómenn, fiskverkafólk, fiskverkendur og aðrir sem áttu beina eða óbeina hagsmuni af veiðum og vinnslu.  Gjörsamlega var gengið á skjön við alla heilbrigða hugsun um atvinnufrelsi og opið markaðskerfi.

Áður hef ég hér í bloggfærslum og í greinum gert grein fyrir hugmyndum mínum á útfærslu uppboðskerfis þar sem allir ættu jafna rétt til boðanna og þá einungis til skamms tíma í senn.  Það er gjörsamlega glórulaust að svokallaðir "sægreifar" sitji að aflaheimildunum eins og fyrri tíma lénsherrar og skammti örðum skít úr hnefa.

Kerfi sem þetta er eins og mein sem étur lífgjafann innanfrá.  Allir vita en líta undan því meinsemdin er miður geðsleg og mun valda mörgum tjóni þegar á henni verður stungið.  Það verður samt ekki hjá því komist, því fyrr því betra.

Nýtt fiskveiðiár mörgum erfitt

Slysahætta vegna kæruleysis

Þessi frétt vekur mann til umhugsunar hvort virkilega séu enn til flutningabílstjórar sem læsi ekki gámalásum.  Öðruvísi getur gámur ekki fokið af vagni. 

Þrátt fyrir alla þá umræðu sem verið hefur um slælegan og hættulegan frágang á farmi má enn sjá kærulausa (og/eða heimska) bílstjóra sem ekki ganga tryggilega frá flutningi.  Eru þessir menn tilbúnir til að hugsa þá hugsun til enda hvað geti gerst þegar t.d. gámur fýkur af?  Eru menn tilbúnir til hins sama með óbundnar vinnuvélar á vögnum?

Ég bara spyr?

Gámur fauk af bíl á Kjalarnesi

Takk Óli, takk Logi, takk Alexander, takk, takk......

Í dag kemur íslenska landsliðið í handbolta heim eftir frábæran árangur á Ólympíuleikunum í Kína.  Það er búið að vera stórkostlegt að fylgjast með þessum drengjum í hverjum leiknum eftir annan.  Baráttuandi, skipulag og fyrst og fremst leikgleði hafa drifið liðið áfram og hver stjórþjóðin eftir aðra var að velli lögð.

Ég vil þakka liðinu fyrir þær einstöku ánægjustundir sem það hefur veitt mér sem og öðrum áhorfendum.  Það var auðvelt að hrífast með eins og raunar öll þjóðin gerði í gleði sinni.  Gömul þjóðernisvitund tók sig upp og hressti upp á þjóðarsálina.  Samt er það alltaf svo að einn og einn rekur hornin í eins og við höfum orðið vitni að hér á blogginu undanfarna daga.  Meira að segja forsetafrúin varð fyrir þessu vegna þess að hún mátti ekki sýna sömu gleði og hrifningu og hver annar.  

Tökum okkur Ólaf Stefánsson til fyrirmyndar og segjum "bíbb" á slíkar nöldurskjóður og mætum í miðbæinn til að taka á móti liðinu.  Sýnum þar með þakklæti okkar í verki og gleðjumst með þeim í dag.

Enn og aftur.  Þúsund sinnum TAKK, TAKK, TAKK....

Áhyggjuefni fyrir borgarbúa

Það er verulegt áhyggjuefni borgarbúa eigi að slá þessum framkvæmdum á frest um óákveðinn tíma.  Uppbyggingin tónlistarhúss, WTCR auk hótels er á mjög viðkvæmu svæði sem illa þolir hálfkaraðar framkvæmdir.  Slík dæmi höfum við fyrir augunum um allan bæ og ekki síst í miðbænum.

Samningur mun vera milli allra málsaðila um uppbyggingu svæðisins og það er með ólíkindum að ekki hafi verið hugsað lengra varðandi fjármögnun verksins en raun ber vitni.  Þarna verður framkvæmdaaðilinn að standa við sitt og ljúka við verkið eins og um var samið.

Annað er ekki boðlegt.

Viðskiptamiðstöð slegið á frest