Íslenskir fjölmiðlar og réttlætið - óhugnanleg greinaskrif

Grein Kristjáns Guðmundssonar skipstjóra á bls. 30 í Morgunblaðinu í dag er mér umhugsunarefni.  Greinin nefnist "Íslenskir fjölmiðlar og réttlætið".  Ég las greinina yfir morgunmatnum og varð hreinlega flökurt.  Ég hvet alla að lesa greinina og viti menn:  Breiðavík lifir enn!

Til fróðleiks:  Höfundur greinarinnar, Kristján Guðmundsson sem kallar sig skipstjóra er fyrrverandi framkvæmdastjóri Rannsóknarnefndar sjóslysa.  Forveri hans í því starfi mun hafa heitið Þórhallur Hálfdánarson.  Þar áður var hann forstöðumaður í Breiðavík.

beggibestur - athyglisvert

Mig langar bara að vekja athygli ykkar á blogginu hans Begga og mömmu hans, henni Margréti Annie.  Hér fer mjög athyglisverð saga 11 ára drengs sem ekki passar inn í okkar sjálfhverfa mynstur, 11 ára drengs sem fær ekki heldur inn í skóla og er nú kominn inn á BUGL, vonandi í góðar hendur.  Svo þekki ég til fjölskyldunnar, sem voru nágrannar mínir í mörg ár í Stykkishólmi.  

Sendi þeim stuðningskveðjur. 

Ógæfu Haitibúa verður allt að vopni

Á meðan BNA ræðst á Afganistan og Írak til að flæma burtu grimmar einræðisstjórnir hafa þeir eins og undanfarna áratugi viðhaldið einhverjum ógeðfelldustu einræðisherrum víða í Karbíska-hafinu og Mið-Ameríku.  Haiti er einhvert versta dæmið um svona stjórnarfar.  Hver man ekki eftir Papa Doc og syni hans Baby Doc.  Þessir feðgar sátu sem "þjóðhöfðingjar" í Port au Prince í skjóli BNA-stjórnar.  Grimmd þeirra og illska er einhver sú versta í mannkynssögunni og fara þar í flokk með Gengis Khan, Idi Amin, Pol Pot svo einhverjir séu nefndir.  

Í hvert skipti sem íbúar Haiti hafa svo mikið sem sýnt lýðræðistilburði, sbr. kosningu Aristide, hafa Bandaríkjamenn sýnt landsmönnum í tvo heimana.  Skiptir þar miklu máli að tryggja sér vígstöðu gagnvart nágrannanum Kúbu. Fleiri dæmi af svipuðum toga úr þessum heimshluta mætti nefna en ósköp verða rökin þeirra Bush og Blair vegna Íraksstríðsins vesöl þegar við minnust hegðan þeirra gagnvart grannríkjum sínum.

Og aldrei hefur undirlæguháttur íslendinga orðið meiri en þegar tveir menn tóku þá ákvörðun að íslenska þjóðin tæki þátt í þessu stríði.  Mikil er þeirra skömm. 

Talið að 8.000 Haítíbúar hafi verið myrtir í tíð bráðabirgðastjórnarinnar

...öngull heimskunnar

Hollt umhugsunarefni þegar skoðanakannanir rugla bestu framsóknarmenn í ríminu.  Ljóðið er reyndar eftir góðan og genginn framsóknarmann, Brynjólf Sæmundsson á Hólmavík 

 

 Í hyl spekinnar

undir holbakka þagnarinnar

liggja rök tilverunnar

undir steini

 

Í rassi aldarinnar

hulinn mistri viskunnar

stendur öngull heimskunnar

í beini

Að skipta á kjörum við Hannes

Mjög gott innlegg hjá Jónínu Ben.  Allt talnaflóðið og flókanar útskýringar á Gini-staðlinum skipta þann sem á ekki að éta engu máli - engu máli!

Ég veit alla vega um fólk sem væri alveg tilbúið að skipta á lífstíl við Hannes Hólmstein.  

Spurningin er væri hann til að skipta á kjörum? 

Vinir okkar Japanir. EKKI FYRIR VIÐKVÆMA

Ímynd íslendinga í augum um heimsins. 

Hver er hún og skiptir hún einhverju máli? Hver er t.d. ímynd Japana, vina okkar og bandamanna í hvalveiðum?

Hér eru bandamennirnir og vinirnir í baráttu okkar íslendinga gegn öfgasinnuðum hvalavinum.

Skoðið myndbandið.  Þeim sem auðnast að eiga þessi vini þarfnast ekki óvina.

Varúð:  Þetta er ekki fyrir viðkvæmar sálir! 

Á hvaða öld eru þessir menn?

Í dag var verið að áfrýja máli olíuforstjóranna þriggja til Hæstaréttar eftir að héraðsdómur hafði vísað málinu frá á þeirri forsendu að ekki væri hægt að sækja einstaklinga til ábyrgðar gagnvart brotum fyrirtækjanna sem þeir stjórnuðu.  Auðvitað! Auðvitað!  Hvernig var þetta, vissuð þið ekki að fyrirtæki sem brjóta af sér hafa sjálfstæðan vilja og forstjórarnir koma þar hvergi nærri.  Bara þegar vel gengur.  Þá fá þeir ríflegan kaupauka og rétt til hlutafjárkaupa á kjörum langt undir markaðsverði.  Nóg um þessa bullfrávísun héraðsdóms.   

Samkeppni er bara í orði - ekki á borði, alla vega ekki fyrir almenning.

Grein af sama meiði er hið ótrúlega fyrirbæri Samorka.  Samstarfsvettvangur orkuframleiðanda og orkusala.  Er ekki frjáls samkeppni á þessum markaði? Mér var talin trú um að og bréf þar að lútandi fékk ég  nýverið frá orkusala sem vildi selja orku - á nákvæmlega sama verði og "keppinauturinn".  

Hvað með Neytendastofu?  Hvar er hún? Hvaða ráðherra fer með neytendamál?  Ávarpaði hann kannski aðalfund Samorku?  

Er það rétt hjá mér að iðnaðarráðherrann Jón Sigurðsson hafi með orkumál að gera?

Er það rétt hjá mér að viðskiptaráðherran Jón Sigurðsson hafi með samkeppnismál að gera?

Spyr sá sem ekki veit........ 

Franz Árnason nýr formaður Samorku

Er þetta ekki bara framför...hvað finnst ykkur?

Er þá langþráður draumur kvennaguðfræðinnar í sjónmáli.  Guð í hvorugkyni núna.  Kvenkyn í næstu þýðingu?

Hvað með þá Jesús, Maríu eða heilagan anda?

„Biblía 21. aldarinnar“

Hver á að gæta bróður míns?

Þegar ég var unglingur hafði maður óljósar spurnir af hinum skelfilega stað, Breiðavík.  Samt vissi maður ekki alveg hvað var svona skelfilegt við þennan stað en í huga okkar strákana var þetta sá staður sem fæstir höfðu áhuga að heimsækja.  Sumum var hótað af kennurum, foreldrum og jafnvel lögreglu að réttast væri að senda þá vestur þegar viðkomandi urðu of uppátækjasamir.  Já, þarna fyrir vestan væri sko ekki tekið með neinum silkihönskum á óþekktarormum.  

Mörgum árum seinna eignaðist ég trúnað eins þeirra er þarna dvöldu.  Hann sagði mér frá sumum af þeim hörmungum sem hann varð fyrir sem og aðrir.  Ég átti erfitt með að trúa og reyndar trúði ég ekki nema litlum hluta frásagnarinnar.  Hann sagði mér líka að sumum nágrönnum heimilisins var vel kunnugt um að þarna væri ekki allt sem skyldi.  Þessi frásögn tók á og var honum erfið.  Samt trúði ég ekki.  Trúði ekki og skammast mín fyrir það í dag, nú þegar verið er að moka öllum óhroðanum út.  Það er gott, gott að hreinsa til.  Þeir eiga það svo sannarlega skilið drengirnir sem þarna dvöldust.   

Það sem þarna gerðist er aldeilis ekki óþekkt, muna menn eftir Bjargsmálinu þar sem stúlkubörn voru fórnarlömb, ekki karla, heldur kvennanna sem trúað var fyrir uppeldi þeirra.  Ekki var Bjarg afskekkt eins og Breiðavík.  Bjarg var á þeim tíma í túnjaðri Reykjavíkur.  Samt kom málið í opna skjöldu.  Hvers vegna?

Sambærileg nýleg dæmi eru frá Noregi, Írlandi og USA svo eitthvað sé nefnt.  Það eru fá dýr jafn grimm manninum og grimmd hans snýst oftast gegn einstaklingum sömu tegundar.  Það er kannski að bera í bakkafullan lækinn að ræða þetta mál hér en í huga mínum brenna fyrst og fremst þrjár spurningar:

Í fyrsta lagi:  Fjöldi fólks vann á Breiðavíkurheimilinu.  Hvernig gat það látið ástandið afskiptalaust?

Í öðru lagi:  Stjórn heimilisins var mestmegnis búandi í nágrenninu, á Patreksfirði og sveitinni.  Hvernig sinnti þetta fólk því trúnaðarstarfi sem það var kjörið til?

Og í þriðja og síðasta lagi:  Miðað við það sem sagan hefur kennt okkur, hvar ætli Bjarg og Breiðavík sé núna? 

Verum vakandi fyrir því sem gerist í kring um okkur og tökum ekki öllu sem sjálfgefnu. 

Farin, bless!

Þá kom að því allir gátu sagt sér sjálfir.  Magga farin, búin að segja bless.  Eitt sem leikur forvitni á að vita: 

Tók hún nafn flokksins, Frjálslyndi flokkurinn, með sér?