Árni Johnsen er sjálfum sér líkur, enn og aftur!

Enn einu sinni er Árni Johnsen búinn að koma sjálfum sér í vandræði.  Nú síðast fyrir að ráðast með einstaklega óverðugum ærumeiðingum um Gunnar Gunnarsson aðstoðarvegamálastjóra.  Manninum virðist ekki vera sjálfrátt og margt líkt með hegðan hans og sumra þeirra ofbeldissinnuðu vörubílstjóra sem hafa verið í sviðsljósinu síðustu daga. 

Ekki er rétt að rekja allan feril Árna hér en hann hefur svo sem margt reynt um dagana blessaður; blaðamennsku, stjórn brekkusöngs (þrátt fyrir lagleysi og tvö gítargrip), merkingar á vörusendingum hjá BYKO, grjótnám af Snæfellsnesi (þar sem hann dvaldi um tíma fyrir "tæknileg mistök") og nú upp á síðkastið hefur manngarmurinn fengið jarðgöng til Vestmannaeyja á heilann.   Ekki vil ég dæma um hvort unnt sé að gera jarðgöng til Eyja, en jafnvel þó teknar séu hans lægstu kostnaðartölur dugar það hvergi til að réttlæta slíka framkvæmd (ekki frekar en Héðinsfjarðargöngin).  Í þessu gangnaæði hefur kappið borðið hann ofurliði og vart getur lakari talsmann nokkurs málefnis nema kannski Sturlu Jónsson vörubílstjóra.

Þrátt fyrir mjög alvarlegt trúnaðarbrot þegar hann sem alþingismaður gerðist sekur um þjófnað á almannaeigum og fénýtingu ýmissa þeirra verðmæta sem honum var falin umsýsla á var ekki að finna á honum minnstu iðrun.  Eftir að hafa setið af sér hluta dómsins vestur á Snæfellsnesi bauð hann sig fram til þings í síðustu kosningum og náði þar kjöri, illu heilli.  Þar sannaðist hið fornkveðna:  Kjósendur fá allaf það sem þeir eiga skilið.

Árni er fyrst og fremst utangarðsmaður, lagast illa að siðaðra manna samfélagi og vill á stundum leysa málin með frekar ofbeldisfullum athöfnum svo sem að beita hnefum og fótum á þá sem honum er illa við svo sem homma, kjaftfora krata og aðra slíka.  Ekki skal ég dæma hvort honum frýjar til vitsmuna en eitt er ljóst; Ætla má að Árni hafi varla notað það litla sem honum var gefið.  Slík er hegðun hans og framkoma öll. 

Þessi síðasta árás hans á Gunnar Gunnarsson er algjörlega í stíl hans, órökstudd, ruddaleg og full af biturð þess sem hefur þurft að bíta í það súra.  Kannski hefði hann gefið Gunnari á kjaftinn hefði hann átt þess kost.  Slíkum ávirðingum sitja embættismenn ekki undir og því ber að fagna ákvörðun Gunnars að kæra þingmanninn fyrir ærumeiðingar.   Það er ekki hægt annað en að taka undir með Gunnari þegar hann segir setu hans á þingi Sjálfstæðisflokknum og íslensku þjóðinni til skammar.  Það eru orð að sönnu.

Ætlar að kæra Árna Johnsen

Athugasemdir

[Sævar Einarsson, 27.4.2008 kl. 08:43]

Ég ætla ekki að tjá mig um téðan mann en ég skrifaði um þennan gjörning um daginn og má lesa um það hér

[Þórður, 27.4.2008 kl. 09:42]

Það má vel vera að hann fara ofari í þessari grein, en eitt er víst að þeir í samgönguráðuneytinu og vegagerðinni, eru ekki yfir gagnrýni hafnir, þeir virðast ekki geta gert neitt rétt t.d. með Sæfara, Grímseyjarferjuna, og svo er eitt dæmi í viðbót með Hríseyjarferjun, hún er búinn að vera gallagripur síðan hún kom. Sem gott dæmi um þessa fávísu hjá vegagerðinni, þegar Hríseyjarferjan kom þá sló alltaf út rafmagni um borð þegar nota átti hliðarskrúfuna, í stað þess að setja stærri rafmótor þá var tekin sú ákvörðun að taka af skrúfublöðunum svo að rafmótorinn væri ekki að slá út, en við það varð skrúfan of lítil og hefur ekki nægt afl til þess að hreyfa ferjuna. Bilunartíðni um borð í þessari ferju er með eindæmum. Sem betur fer eru tvær vélar um borð því annars væri búið að fella niður mjög margar ferðir á þessu ári. Hefur það meira segja komið fyrir að báðar vélarnar hafa slegið út í einu og það inní höfn, og rak ferjuna í strand í höfninni á Árskógsandi, sem betur fer fór vel í það skiptið. Þessir andskotar hjá vegagerðinni eiga alveg skilið alla þá gangrýni sem á þeim dynur.

[Sveinn Ingi Lýðsson, 27.4.2008 kl. 10:10]

Að sjálfsögðu má gagnrýna Vegagerðina að vild.  Gera verður þá kröfu til gagnrýnenda að vera málefnalegir og láta ekki gagnrýni sína bitna á persónum manna, hvað þó rustafegnum svívirðingum Árna Johnsen.

Sumir orða það þannig að hann eigi til að heilsa að sjómannasið.  Ég vil mótmæla því harðlega.  Íslenskir sjómenn eiga það ekki skilið að vera bendlaðir eða líkt við hegðun Árna.  Hann kann ekki mannasiði, er eins og óþekkur krakki þegar hann fær ekki allt sem hann vill og beitir síðan ofbeldi þegar í þrot er komið, sbr. þessa árás, hommakýlingar, spörk í krata og annað í þeim dúr.

Svo ekur hann um með einkanúmerið ISLAND.  Þvílík skömm!! 

[Einar Þór Strand, 27.4.2008 kl. 15:36]

Sæll Sveinn er ekki enn meiri skömm að embættismaður sem er lögfræðingur skuli reyna það sem hann er að gera, einkum vegna þess að lögin um þinghelgi eru sett til að vernda þingmenn fyrir embættismönnum sem oft ganga of langt í að hafa pólitískáhrif.  Því hvað sem um Árna má segja þá hefur hann skoðanir og er ekki hræddur við að viðra þær.  Ef þú lest grein Árna þá er ekki um persónulega árás að ræða heldur ber hann Gunnari á brýn að hann hafi ekki unnið hlutlægt í nefndinni um samgöngumál til eyja, og Gunnar verður að þola þá gagnrýni eins og lögreglan verður að þola það að þeir unnu illa á suðurlandsvegi síðasta vetrardag.  Hvernig stóð á því að mennirnir með piparúðan voru ekki með hjálma og aðrar hlífar?  Eru það vinnubrögð sem eru viðundandi af lögreglunni?

[Sveinn Ingi Lýðsson, 27.4.2008 kl. 18:24]

Einar:  Alþingismenn hafa stjórnarskrárvarða þinghelgi, þ.e. það er að ekki má lögsækja þá fyrir ummæli sem þeir viðhafa um málefni eða nafngreindar persónur innan veggja þingsala.  Ummæli utan þeirra og á prenti eru fyllilega aðfarahæf að lögum.  Að margra mati er Árni illa haldinn af þráhyggju og sérstaklega gagnvart Vegagerðinni í þessari jarðgangahugsjón hans.  Í þeim efnum hefur hann lítt sést fyrir þó svo að í þessari grein hafi  hann algjörlega farið yfir strikið.  Það verður að gera þá kröfu að þingmaðurinn Árni (hann skrifar undir sem alþingismaður) haldi sig við málefnaleg rök en veitist ekki að manni fyrir það eitt að vinna vinnuna sína.

Ég er alls ekki sammála að lögreglan hafi unnið illa í Rauðavatnsuppþotinu þrátt fyrir að sum atriði í aðgerðinni megi gagnrýna.  Í heildinni voru vinnubrögð þeirra alveg eftir bókinni varðandi svona aðgerðir.  Ekki er nein þörf á persónuhlífum eða gasgrímum við piparúða.  Slíks er einungis þörf sé notað mace eða táragas.  Það var alveg ljóst að þarna fóru vel þjálfaðir menn sem eru lögreglunni til sóma.  Þarna var auðveldlega hægt að hleypa öllu í bál og brand en enginn meiddist svo heitið geti, ólátaseggirnir voru sóttir skipulega inn í mannfjöldann og fjarlægðir.  Eftir voru krakkar í eggjakasti, uppspanaðir af fjölmiðlafólki sem taldi sig hafa heldur betur komist í feitt.  Eini fjölmiðillinn sem getur borið höfuðið hátt er RÚV sem mættu strax á staðinn og fluttu hlutlausar fréttir af vettvangi.